CELLAL/RENNDO: Fedde AVOMM hurminii lappol cellal ɗiɗaɓol e reedu Fuuta-Tooro

Fedde daraniinde wallude ɓesnguuji kooniŋkooɓe ɓaleeɓe waraaɓe e nder yanooji jaasɗi laamu Maawiiyaa fuɗiima lappol mum e nder Fuuta ngam addude balle, leɗɗe e kaɓirɗe paytuɗe e safaruuji. Ɓe puɗɗiima golle caggal nde ɓe njettii ñalnde 15 Colte to Nuwaasoot. Ko hikka waɗti cili ɗiɗi fedde ndee ena yuɓɓina ngol lappol. Lappol ngol ena nawori minikaar e werlaa 4X4 ena rimndaa leɗɗe haa heewi. Yahdi e mayre ko safooɓe 13 (doktoreeɓe), heedtoreeɓe 5 (infirmieres) e farmasiŋkooɓe 2.

Ɓee-ɗoo fof ko ɗoftiyaŋkooɓe gollortooɓe Alla meho e dow gardagol Usmaan Adbul Saar, hooreejo fedde AVOMM; Kan Haaruuna, kalfinaaɗo jokkondire; Muhammed Dogi, wasiyŋke jojjanɗe aadee fedde ndee; Maymuuna Alfaa Sih, koolaaɗo kuuɓal Dentital Heyniiɓe e Kan Mammadu, koolaaɗo ɗowgol golle fedde OPRPH. Hade gollotooɓe ɓee yettaade Senegaal, ɓe keblii hakke yontere kala kaɓirɗe, jippule ekn ngam jaɓɓaade arooɓe wallude ɓee. Ɓe kawrii kadi e hohooɓe nokkuuji ñiiɓirɗe ɗii ngam famminde-ɓe no golle ɗee ciforii haa teeŋti hol ko saabii gure ñiiɓirɗe ɗee cubiraa nih hikka.
E yontere jokkondire huumnunde, hooreejo Usmaan Abdul Saar hollitii beltanagol makko no golle ɗee lelniraa nih haa teeŋti e ballal ANAIR (Cattal laamu toppitiinde ggartugol mooliiɓe) e Jaagorde Cellal. Laamu nguu weeɓnaniiɓe yah-ngartaa e diiwanuuji ɗii ngam lappol ngol waawa waɗde golle peewɗe. Diiwanuuji cuɓaɗi ngam ñiiɓnude lappol ngol ko:
. Trarza Rosso Lycée
. Gani
. Dabaye M’Bagnik
. Brakna
. Dar Salam
. Houdalaye
. Bellel Ourguel
Nokkuuji kala ɗo mooliiɓe ngoni ena toɗɗanaa ñiiɓirɗe e ñalɗi ɗo poti hawrude e lappol ngol. E ñalngu ndadanngu lappol ngol (15 Colte 2010), hohooɓe AVOMM e hooreejo OCVIDH yantude e diɗɗe safrooɓe ɓee ngummiima Nuwaasoot fayde werorde Trarza Rosso Lycée. Ko no janngo mum nih (16 Colte) ɓe udditi berorɗe 3 paasogol e farmasiŋ baɗɗɗo leɗɗe kala ɗe ñawbuuli binntitaaɗi ɗii naamnii. Gorwocci yimɓe juutɗi puɗɗii hebbinde nokkuuji ɗii e dow deeƴre e hakkille. Ñalnde heen paasogol e dokkirgol leɗɗe ɗee ñalli haa naange muti...Eɗen ɗaminii maa ngol lappol addu safaara e aafiya e ɓerɗe hoɗɓe e ɗii diiwanuuji. Ko duwaade yoo Alla hokku-ɓe cellal e newaare no ɓe ciyniri ɗee golle paayodinɗe!

Kuɗol Ibraahiima SAAR

PULAAGU.COM