Caŋkaale ɓe nayiiji nannduɗi

Kaaliidu e Haamiidu ko funeeɓe jiiduɓe Nay :
-Ko ɓe enɗam asko
-ko ɓe yontidaaɓe sahaa
-ko ɓe laaɓɓe deedi
-ko ɓe jokkidaaɓe balɗe.
Kaaliidu Ceernel SIH e Haamiidu NGAYDE, ɓe Jowol saare Wajjuɓe NDEENI, ɓe saare Dono Gelaajo JEEGI kadi kon saare Biraan GAALE, ko he ɓe hono mum en mbeeɓaani ɓe njeyanoo.
Haamiidu NGAYDE ngel Sammba e Kajji, mo nelal ngal heewɓe paamaano, so wonaa ɓe ɓerɗe lawƴiraaɗe Makanjam e Haayorde, ɓe hakkillaaji jumtuɗi cocciraaɗi Ceenal Bilbasi. NGAYDEL Tooroodo, toraniima en GENO, o ɗiggi heen etee o ñiiɓi heen kadi ko heen o heddii : yiɗde goɗɗo haa ɓurana ɗum hoyre mum. Ngeti o yahnoo ko walloyde e danndoyde haa boomaare nde hoɗi.
Laaɓa reedu mo alaa nanndo nde hooti nde, kuɗi ngukkitii ngommbudi tawa faltaaki hay gootol e leƴƴi Moritani (Fulɓe e Sooninkeeɓe e Jolfuɓe e Hardaneeɓe e Safalɓe). Gootol kala yooɗaama gorko mo saare Tinis, gural Hammee e Biidaani, gural Faatuma e Faatumeere, hay meere omo renndee.
So tawii ko goonga he men ndeke taf-en Moritani men he dow nulal NGAYDEL toraniiɗo en Neɗɗankaagu jaabaa.
Yo GENO yurmo Kaaliidu e Haamiidu, ñuuba ɓe e beeli malal. Aanemiin!
En njaalanii ma koye men e koye ɓesnguuji ɓadiiɗi kala.

Sammba Cooyel BAH
Ñalnde 01/07/2010 ɗo e Nuwaasii-Lo-Sek to Farayse