DOWLAAJI DENTUƊI: Muritaninaaɓe ceppi e Waashington DC! écrit par HADY ANNE

Muritaninaaɓe wuurɓe leydi Amerik ceppii ñalnde Aaɓde 10 Duujal 2010 yeeso jooɗorde (ambassade) Muritani wonnde Washington DC, laamorgo DD Amerik, yiɗde holirde metere nde be njogii e haala gardiiɗo jaagorɗe leydi maɓɓe Mohamed Wul Mohamed Lagdaf haali ñalde "mawningol ɗemngal Arab". O wiyno: "Laamu Muritani ina jogii anniya huutoraade ɗemngal Aarabeere e kala liggorɗe laamu, janngirɗe e wittooji ganndal". Kono kala keɗɗiiɗo ka haala ina faaya wonde faandaare maɓɓe ko yiɗde warde pine e ɗemɗe ɗe ngonaa aarabeeje gonɗe e Muritani.

Jaagorgal kalifinaangal Pinal e Cukaagu Siise Mintu Boyda teeŋtini haala mawɗo makko nde o holliti ko "ɗemɗe kalateeɗe e leydi ndii kaɗii Arab ƴellitaade". Dille ngadii waɗde ko to Muritani caggal nde ɓaleeɓe jaŋngooɓe e jaaɓi haaɗtirde Nuwaasot ceppi ngam holirde Salaare mum'en e ko laamu nguu wowli koo. Ko ɗum kadi waɗi Muritaninaaɓe wonɓe Dowlaaji Dentuɗi Amerik rentude Whashigton DC hollitde metere mum'en, sibu laamu leydi maɓɓe ina suuti leñol ngootol, ɗemgal gootal ina fawi dum e dow ɗemɗe goɗɗe ɗee.
Muritaninaaɓe heewɓe nootitiima e noddaago ngoo: rewɓe, worɓe e sukaaɓe, ɓee ngummiima Sinsinaati, Kolumbus, Niw-yorko,Filadelfiya e Washington, gooto kala ardi e pellital yiɗde hollude hay gooto huccittaa e pine walla ɗemɗe ena mbaree tawa ndillaani. Ko ɓurii heewde e alluuje ɗe ɓe mbeeyni e seppo ngoo hollitta ko salaare caɗeele pawaaɗe e dow ɓaleeɓe e ɗemɗe mum'en gila duuɓi. Ena winndaa heen "Min jaɓataa, ɗemɗe amen ina momtee, pine amen ina mbaree, neɗɗaagal amen ina yaɓɓee sibu yiɗɗe mawninde Arabeere e arabaagal; ko min juulɓe kono min ngonaa arabeeɓe, min caliima macugaagu etee yoo laamu ngu dartin ɓittude haɓantooɓe jojjanɗe aadee". Hohooɓe yuɓɓinɓe batu nguu kollitii wonde ɗee caɗe fof ena njeyaa e ko ummini-ɓe, haa teeŋti e potal ɗemɗe.
"Amin ngoogɗini potal ɗemɗe ngendiiji fof ( Arabeere, Pulaar, Sooninkoore, Wolof e Wamaraŋkoore). Yo ɗemɗe ɗee fof ndokke hakke majje e leydi Muritani". "Dawrugol leydi Muritani yiɗi ko hiiɓde ɓaleeɓe sabu leñol so haɗaama demngal mum maayat, dum noon min caliima wareede".
"Hay gooto hoto to yiyru seppo amen hannde salaade ɗemngal arabeere, min calii ko yoo ngal ɗemngal huutore ngam hiiɓde ɓaleeɓe Muritani. Sabaabu seppo ngo ko ha laamɗo leydi ndii annda bonannde wawnde jibineede e ɗi halaluuji e jeertinde laamu Amerik e Aduna oo kala, yidde amen jam e kisal nder leydi amen".
Ɓataake huccinaama e laamɗo leydi Muritani Mohamed Wuld Abdel Asiis; jaagorgal Amerik kalfinaangal jokkondiral hakkude leyɗeele e pelle jojjanɗe Aadee gonɗe e Amerik.
Ko waktu 2ɓo kikiiɗe seppo ngoo dartii, yimɓe ɓee mbaynii, ndokkondiri aadi ina njokka hare haa potal waɗa e leydi Muritani.

Kuɗol Haadii Aaan

Source: PULAAGU.COM